Foto: stv.uz

«O‘zgidromet» 26–27 mart kunlari kutilayotgan kuchli yomg‘irlar yog‘ishi sababli respublikaning tog‘oldi va tog‘li hududlarida sel xavfidan ogohlantirdi.

Qayd etilishicha, quyidagi hududlarda sel kelish xavfi e’lon qilinadi:

• Qashqadaryo viloyati: Yakkabog‘, Dehqonobod, Chiroqchi, Kitob, Shahrisabz, Qamashi, G‘uzor tumanlarida;
• Surxondaryo viloyati: Sariosiyo, Uzun, Oltinsoy, Denov, Boysun, Sherobod, Sho‘rchi, Qumqo‘rg‘on, Muzrobot tumanlarida;
• Samarqand viloyati: Urgut, Samarqand, Bulung‘ur, Nurobod, Qo‘shrabot, Kattaqo‘rg‘on, Payariq, Jomboy, Ishtixon tumanlarida;
• Navoiy viloyati: Xatirchi, Navbahor, Nurota, Konimex, Karmana tumanlarida;
• Jizzax viloyati: Zomin, Baxmal, G‘allorol, Sharof Rashidov, Forish, Yangiobod tumanlarida;
• Toshkent viloyati: Ohangaron, Bo‘stonliq, Parkent, Yuqori Chirchiq tumanlarida;
• Namangan viloyati: Pop, Kosonsoy, Chortoq, Chust, Namangan, Yangiqo‘rg‘on tumanlarida;
• Farg‘ona viloyati: So‘x, Farg‘ona, Beshariq tumanlarida;
• Andijon viloyati: Andijon, Jalaquduq, Qo‘rg‘ontepa, Paxtaobod, Izboskan, Xo‘jaobod, Marhamat tumanlarida va Xonobod shahrida sel-suv toshqin hodisalari yuzaga kelishi mumkin.

Tog‘oldi va tog‘li hududlarda istiqomat qiluvchi fuqarolardan, dam oluvchilar hamda tog‘li hududlarda harakatlanuvchi haydovchilardan ehtiyotkorlik choralarini ko‘rish so‘raladi.

Eslatib o‘tamiz, Gidrometeorologiya xizmati markazi 17 mart kuni O‘zbekistonda 2022 yil mart oyi uchun ilgari kuzatilmagan darajada yomg‘ir yog‘gani haqida ma’lum qilgandi. Mart oyi boshlangandan beri respublikaning tog‘li va tog‘oldi hududlarida yog‘ingarchilik odatdagidan 2-3 marta ko‘p bo‘lgan. Toshkentda deyarli 2 oylik miqdorda yog‘ingarchilik yog‘gan. 

Manbaa: kun.uz

Avtomobil yo‘llari qo‘mitasining tegishli buyrug‘i bilan Jizzax mintaqaviy yo‘llar buyurtmachi xizmati davlat unitar korxonasiga shu kungacha Jizzax viloyat avtomobil yo‘llari bosh boshqarmasida boshliq o‘rinbosari lavozimida ishlab kelgan Anorboyev Shuhrat Jo‘raqulovich direktor etib tayinlaydi. Anorboyev Shuhrat Jo‘raqulovich ko‘p yillarda viloyat yo‘l sohasida turli rahbar lavozimlarida ishlab kelgan, jumladan, 2006-2009 yillarda Do‘stlik tuman yo‘l xo‘jaligi pudrat ta’mirlash-foydalanish korxonasi direktori, 2014-2017 yillarda Jizzaxavtoyo‘l hududiy yo‘llardan tashkiloti bosh muhandisi kabi lavozimlarda ishlab kelgan.

Jizzax viloyat avtomobil yo‘llari bosh boshqarmasi Anorboyev Shuhrat Jo‘raqulovichga kelgusi ish faoliyatida omad va zafarlar tilaydi.

foto: xabar.uz

O‘zbekiston hududiga 10—16-mart kunlari Erondan iliq va nam havo, so‘ngra Kavkaz hududlaridan nisbatan salqin havo massasi kirib kelishi kutilmoqda. Shu munosabat bilan “O‘zgidromet” shoshilinch axborot e’lon qildi.

Qayd etilishicha, 11—16-martda respublika hududining katta qismida vaqti-vaqti bilan yomg‘ir yog‘adi, momaqaldiroq bo‘lishi mumkin. 11-martda Buxoro, Navoiy, Toshkent, Samarqand, Jizzax, Sirdaryo, Qashqadaryo, Surxondaryo viloyatlarida ba’zi joylarda kuchli yomg‘ir yog‘adi. 12-martda Buxoro, Navoiy, Toshkent, Samarqand, Jizzax, Sirdaryo, Qashqadaryo, Surxondaryo, Andijon, Namangan, Farg‘ona viloyatlarida ba’zi joylarda kuchli yomg‘ir yog‘adi. 13-martda Toshkent, Samarqand, Jizzax, Sirdaryo, Qashqadaryo, Surxondaryo, Andijon, Namangan, Farg‘ona viloyatlarida ba’zi joylarda kuchli yomg‘ir yog‘adi.

14-martda Navoiy, Samarqand, Jizzax viloyatlarida ba’zi joylarda kuchli yomg‘ir yog‘adi. 15—16-martda Toshkent, Samarqand, Jizzax, Sirdaryo, Qashqadaryo, Surxondaryo, Andijon, Namangan, Farg‘ona viloyatlarida ba’zi joylarda kuchli yomg‘ir yog‘adi. Respublikaning tog‘li hududlarida yog‘ingarchilik (yomg‘ir, qor), vaqti-vaqti bilan kuchli bo‘ladi. 10—16 martda respublikaning ayrim joylarida shamol kuchayishi kutilmoqda, jumladan:

• 10-mart va 13—16-martda Qoraqalpog‘iston Respublikasida, Xorazm viloyatida 17—22 metr/sekundgacha;
• 11—12-mart va 15—16-martda Buxoro, Navoiy, Toshkent, Samarqand, Jizzax, Sirdaryo, Qashqadaryo, Surxondaryo viloyatlarida 17—22 metr/sekundgacha, momaqaldiroq paytida 25—28 metr/sekundgacha kuchayishi mumkin.

Shuningdek, 11—13-mart kunlari A-373 Toshkent—O‘sh avtoyo‘lining Qamchiq dovoni xududida vaqti-vaqti bilan kuchli yog‘ingarchilik, tuman kuzatilishi, ko‘rinuvchanlik 50 metrgacha pasayishi, shamol tezligi 20—23 m/s gacha kuchayishi, avtoyo‘lda qor uyumlari yuzaga kelishi mumkin.

“O‘zgidromet” 11—15-mart kunlari kutilayotgan kuchli yomg‘irlar yog‘ishi sababli respublikaning tog‘oldi va tog‘li hududlarida sel xavfidan ogohlantirdi. Respublikaning tog‘oldi va tog‘li hududlarida sel xavfi mart oyi boshidan buyon saqlanib qolmoqda. “O‘zgidromet” beqaror ob-havo ish haftasining oxirigacha saqlanib turishini prognoz qilgan.

Bundan tashqari, O‘zbekistonning 18—16-mart kunlari kutilayotgan yog‘ingarchilik sababli qor ko‘chish xavfi e’lon qilingan.

manba: daryo.uz

foto: kun.uz

Prezident 1 martdan «Yashil yillik» umummilliy tadbiri boshlanishini ma’lum qildi. Joriy yil bahor mavsumida «Yashil makon» loyihasi doirasida 125 mln dona daraxt ko‘chatlarini ekish rejalashtirilmoqda. Aholiga kamida 10 mln dona mevali va manzarali daraxt ko‘chatlari bepul tarqatiladi. «Agar O‘zbekistonda ekologiyani yaxshilayman desa, har yili har bir xonadon ikkitadan daraxt eksin. Har bir tashkilot beshtadan daraxt eksin, qaysi tashkilot bo‘lishidan qat’i nazar», — dedi prezident.

2 fevral kuni prezident raisligida bo‘lib o‘tgan videoselektor yig‘ilishida «Yashil makon» umummilliy loyihasini amalga oshirish borasidagi dolzarb vazifalar muhokama qilindi, deya xabar berdi davlat rahbari matbuot xizmati.

2021 yil noyabrda «Yashil makon» umummilliy loyihasi e’lon qilinib, 200 mln tup daraxt ko‘chati ekish rejalashtirilgan edi. Kuzda 85 mln dona ko‘chat o‘tqazildi. Ko‘plab tashkilotlar, mahallalar, umuman, keng jamoatchilik bu savobli ishda jonbozlik ko‘rsatdi. Bu yil bahor mavsumida 125 mln dona daraxt ko‘chatlarini ekish mo‘ljallanmoqda.

«„Yashil makon“ umummilliy loyihasi bir yillik tadbir emas. Uning doirasida kelgusi besh yilda 1 milliard tup daraxt ko‘chatini ekishni maqsad qilganmiz. Bu umummilliy harakatning natijasi har bir mahallada ko‘rinishi kerak, bu savobli ishni havas bilan qilish kerak», — dedi davlat rahbari.

Shavkat Mirziyoyev O‘zbekistonda ekologik muhitni yaxshilashni xohlagan har bir xonadon va tashkilotlarni har yili daraxt ekishga chaqirdi.

«Agar O‘zbekistonda ekologiyani yaxshilayman desa, har yili har bir xonadan ikkitadan daraxt eksin. Har bir tashkilot beshtadan daraxt eksin, qaysi tashkilot bo‘lishidan qat’i nazar. Oliygohmi, maktabmi, tibbiyotmi, katta-katta korxonalarmi. Mana shuni O‘zbekiston tajribasi qilsak, bahor boshlangancha. Xalqimiz qo‘llab-quvvatlaydi, albatta. Mana shuni qilsak, duoga qolamiz», — dedi davlat rahbari.

«Hammaning ham qo‘lidan iqtisod kelmaydi, hammaniyam qo‘lidan investitsiya olib kelish kelmaydi. Lekin ekologik vaziyatga, o‘zimizning tumanimiz, o‘zimizning mahallamizga e’tibor bersak bo‘ladi-ku. Oldin ko‘chatimiz ham yo‘q edi, hozir ko‘chatimiz ham bor», — deya davom ettirdi u.

Prezident, shuningdek, daraxtlarni parvarishlash, sug‘orish va zararkunandalardan himoya qilish tizimlarini ishlab chiqish hokimlarning vazifasi ekanini ta’kidladi.

Yig‘ilishda 1 martdan «Yashil yillik» umummilliy tadbiri boshlanishi e’lon qilindi. Har bir hududning iqlimiga mos, kam suv talab qiladigan ko‘chatlarni tanlab, ularni yetishtirish uchun ko‘chatxonalarni ko‘paytirish zarurligi qayd etildi. O‘rmon xo‘jaligi davlat qo‘mitasiga 10 mln dona mevali va manzarali daraxt ko‘chatlarini aholiga bepul tarqatish, Avtomobil yo‘llari qo‘mitasiga xalqaro va respublika ahamiyatidagi yo‘llar chetida jami 1,5 mln tup daraxtdan iborat ixota daraxtzorlar barpo etish bo‘yicha topshiriq berildi.