4R-38 “M-39 avtoyo‘li (962km) -Uchtepa k-Jizzax sh.-M39 avtoyo‘li (1013km)” avtomobil yo‘ling 10-18 km oralig‘ida joriy ta’mir ishlari
23Фев, 2022
OTB O‘zbekiston yo‘llarining rekonstruksiyasi uchun 273,85 mln dollar ajratadi
Foto: uzavtoyul.uz
Osiyo taraqqiyot banki (OTB) O‘zbekistondagi mintaqaviy aloqalar uchun muhim bo‘lgan milliy yo‘llarni rekonstruksiya qilish va modernizatsiya qilish uchun 273,85 million dollar miqdorida kredit ajratishni ma’qulladi, deb xabar beradi O‘zA.
“Qo‘shni davlatlar bilan savdo va transportni osonlashtiradigan ishonchli yo‘l tarmoqlari dengizga chiqish imkoniyati bo‘lmagan mamlakat sifatida O‘zbekistonning iqtisodiy o‘sishida muhim ahamiyat kasb etadi”, — deydi OTB Markaziy va G‘arbiy Osiyo bo‘yicha bosh direktori Yevgeniy Jukov.
Qayd etilishicha, OTB loyihasi Surxondaryo viloyatidagi Darband va Denov o‘rtasidagi 106 kilometrga yaqin davlat yo‘lini yangilaydi va G‘uzor—Buxoro—Nukus—Beyneu (A380) avtomobil yo‘lining qariyb 87 kilometrini rekonstruksiya qilish imkoniyatini beradi. A380 avtomagistrali Afg‘oniston, Qozog‘iston, Rossiya, Tojikiston, Turkmaniston va O‘zbekistonni bog‘lovchi Markaziy Osiyo mintaqaviy iqtisodiy hamkorlik (SARES) 2-koridorining bir qismidir.
Loyiha kam texnik xizmat ko‘rsatilgan beton qoplamali yo‘llarni kengaytiradi va ularning holatini yaxshilaydi, sayohat vaqtini va transport vositalarini ishlatish xarajatlarini sezilarli darajada kamaytiradi.
“Shuningdek, bu yo‘nalishlar va kesishmalarni yangilaydi, avtobus to‘xtash joylarini va piyodalar uchun qulay sharoitlarni ta’minlaydi, aniqroq belgilar va boshqa xavfsizlik funksiyalarini qo‘shadi. Avtotransport vositalarining ortiqcha yuklanishining oldini olish va yulka yotqizilishining oldini olish uchun Derbent va Denov yaqinida ikkita harakatda tortish tizimi o‘rnatiladi”, — deyiladi xabarda.
Loyiha moliyaviy savodxonlik, onlayn marketing va tadbirkorlikni rivojlantirish bo‘yicha ko‘nikmalarni o‘rgatish orqali loyiha jamoalaridagi tadbirkor ayollarning COVID-19 pandemiyasining salbiy ta’siridan iqtisodiy tiklanishini qo‘llab-quvvatlash uchun 150 ming dollar miqdoridagi texnik yordam grantini o‘z ichiga oladi.
12Фев, 2022
1 martdan boshlab butun mamlakat bo‘ylab “Yashil yillik” umummilliy tadbiri boshlanadi
foto: kun.uz
Prezident 1 martdan «Yashil yillik» umummilliy tadbiri boshlanishini ma’lum qildi. Joriy yil bahor mavsumida «Yashil makon» loyihasi doirasida 125 mln dona daraxt ko‘chatlarini ekish rejalashtirilmoqda. Aholiga kamida 10 mln dona mevali va manzarali daraxt ko‘chatlari bepul tarqatiladi. «Agar O‘zbekistonda ekologiyani yaxshilayman desa, har yili har bir xonadon ikkitadan daraxt eksin. Har bir tashkilot beshtadan daraxt eksin, qaysi tashkilot bo‘lishidan qat’i nazar», — dedi prezident.
2 fevral kuni prezident raisligida bo‘lib o‘tgan videoselektor yig‘ilishida «Yashil makon» umummilliy loyihasini amalga oshirish borasidagi dolzarb vazifalar muhokama qilindi, deya xabar berdi davlat rahbari matbuot xizmati.
2021 yil noyabrda «Yashil makon» umummilliy loyihasi e’lon qilinib, 200 mln tup daraxt ko‘chati ekish rejalashtirilgan edi. Kuzda 85 mln dona ko‘chat o‘tqazildi. Ko‘plab tashkilotlar, mahallalar, umuman, keng jamoatchilik bu savobli ishda jonbozlik ko‘rsatdi. Bu yil bahor mavsumida 125 mln dona daraxt ko‘chatlarini ekish mo‘ljallanmoqda.
«„Yashil makon“ umummilliy loyihasi bir yillik tadbir emas. Uning doirasida kelgusi besh yilda 1 milliard tup daraxt ko‘chatini ekishni maqsad qilganmiz. Bu umummilliy harakatning natijasi har bir mahallada ko‘rinishi kerak, bu savobli ishni havas bilan qilish kerak», — dedi davlat rahbari.
Shavkat Mirziyoyev O‘zbekistonda ekologik muhitni yaxshilashni xohlagan har bir xonadon va tashkilotlarni har yili daraxt ekishga chaqirdi.
«Agar O‘zbekistonda ekologiyani yaxshilayman desa, har yili har bir xonadan ikkitadan daraxt eksin. Har bir tashkilot beshtadan daraxt eksin, qaysi tashkilot bo‘lishidan qat’i nazar. Oliygohmi, maktabmi, tibbiyotmi, katta-katta korxonalarmi. Mana shuni O‘zbekiston tajribasi qilsak, bahor boshlangancha. Xalqimiz qo‘llab-quvvatlaydi, albatta. Mana shuni qilsak, duoga qolamiz», — dedi davlat rahbari.
«Hammaning ham qo‘lidan iqtisod kelmaydi, hammaniyam qo‘lidan investitsiya olib kelish kelmaydi. Lekin ekologik vaziyatga, o‘zimizning tumanimiz, o‘zimizning mahallamizga e’tibor bersak bo‘ladi-ku. Oldin ko‘chatimiz ham yo‘q edi, hozir ko‘chatimiz ham bor», — deya davom ettirdi u.
Prezident, shuningdek, daraxtlarni parvarishlash, sug‘orish va zararkunandalardan himoya qilish tizimlarini ishlab chiqish hokimlarning vazifasi ekanini ta’kidladi.
Yig‘ilishda 1 martdan «Yashil yillik» umummilliy tadbiri boshlanishi e’lon qilindi. Har bir hududning iqlimiga mos, kam suv talab qiladigan ko‘chatlarni tanlab, ularni yetishtirish uchun ko‘chatxonalarni ko‘paytirish zarurligi qayd etildi. O‘rmon xo‘jaligi davlat qo‘mitasiga 10 mln dona mevali va manzarali daraxt ko‘chatlarini aholiga bepul tarqatish, Avtomobil yo‘llari qo‘mitasiga xalqaro va respublika ahamiyatidagi yo‘llar chetida jami 1,5 mln tup daraxtdan iborat ixota daraxtzorlar barpo etish bo‘yicha topshiriq berildi.
3Фев, 2022
1 iyuldan test rejimida avtomobil yo‘llari sohasiga tegishli ma’lumotlar bazasini o‘z ichiga olgan «Shaffof yo’l» platformasi ishga tushiriladi
Foto: uzreport.news
Hukumat qarori bilan 1 iyuldan aholi yo‘llardagi nosozliklar, svetofor va yo‘l belgilari o‘rnatilmagani haqida foto va videomurojaatlarni «Shaffof yo’l» platformasi orqali yuborish mumkin. Ichki yo‘llarni ta’mirlashga oid takliflar ovoz berish yo‘li bilan tanlab olinadi. G‘olib takliflar bo‘yicha yo‘llarni ta’mirlashga har yili mahalliy budjetdan mablag‘ ajratiladi.
Platformaning alohida sahifasiga fuqarolarning yo‘llar nosozligi, shuningdek, yo‘llarda va yo‘l bo‘yida xavfsiz harakatlanish uchun yuzaga kelgan favqulodda texnik muammolar haqida foto va videomurojaatlari jamoatchilik fikri asosida joylashtiriladi. Bu svetoforlar va yo‘l belgilar o‘rnatilmaganligi yoki ularning shikastlanganligi, tabiiy ofatlar natijasida yuzaga keladigan hodisalar ortidan hosil bo‘ladigan oqibatlar va boshqalar bo‘lishi mumkin.
2023 yildan boshlab va keyinchalik har yili qurilishi, rekonstruksiya qilinishi, ta’mirlanishi nazarda tutilgan barcha toifadagi yo‘l uchastkalari xaritaga kiritiladi.
Shuningdek, qarorga ko‘ra, «Ochiq budjet» axborot portali orqali hududiy ichki yo‘llarini ta’mirlash uchun ajratilgan mablag‘lar jamoatchilik fikri asosida shakllangan ichki xo‘jalik yo‘llarni ta’mirlashga yo‘naltiriladi.
Bu bo‘yicha tasdiqlangan nizomga ko‘ra, jamoatchilik fikri asosida ichki yo‘llarni ta’mirlashda takliflarni qabul qilib olish har yili 10 yanvargacha, bildirilgan takliflar orasidan g‘olib takliflarni ovoz berish yo‘li bilan aniqlab olish 31 yanvarga qadar amalga oshiriladi.
«Takliflarni yuborish hamda ovoz berishda voyaga yetgan fuqarolar ishtirok etishlari mumkin. Fuqarolar har yili ichki yo‘llarni ta’mirlashga doir faqat bitta taklifni kiritishi hamda bitta taklifga ovoz berishi mumkin. Fuqarolar o‘zlari tomonidan kiritilgan taklifga ovoz berishi taqiqlanadi. Tanlangan ichki yo‘llar axborot portalida avtomatik ravishda taklif sifatida shakllanadi va boshqa fuqarolarning ovoz berishi uchun imkoniyat yaratiladi», — deyiladi xabarda.
Har bir tuman va shaharlarda bildirilgan takliflar bo‘yicha berilgan eng ko‘p ovozlar sonidan kelib chiqib, yuqoridan pastga qarab saralanadi.
Tuman (shahar) mahalliy budjetlari parametrlarida hududiy ichki yo‘llarni ta’mirlash uchun ajratilgan jami mablag‘larning kamida 50 foizi doirasida g‘olib takliflarni amalga oshirishga yo‘naltiriladi.
Platforma 2023 yil 1 yanvardan boshlab to‘liq ishga tushadi.